Жаһандану жағдайында некені кейінге қалдырудың әлеуметтік-экономикалық факторларын талдау

Аңдатпа

Екінші демографиялық ауысудың элементі ретінде қарастырылатын бірінші некеге кешігу қоғамдағы жаһандық өзгеріс белгілерінің бірі болып табылады. Дегенмен, бұл элемент әртүрлі елдердегі экономикалық мүмкіндіктерге және өзгерістер орын алатын географиялық масштабқа байланысты өзгеруі мүмкін. Бұл зерттеудің мақсаты неке құруға жаһандық өзгерістерге әлемдік экономикалық үрдістердің әсерін талдау. Жүйелі талдау және сыни интерпретация, яғни дәлелдердің сәйкестігін бағалау, жасырын болжамдарды, біржақтылықтарды және ықтимал мәселелерді анықтау әртүрлі материалдарды терең түсіну және бағалау үшін пайдаланылды. Таңдалған әдебиеттер NVivo бағдарламалық құралы арқылы талданды. Экономикалық жағдайлар мен отбасылық шешімдер арасындағы байланысты растайтын зерттеулердің талдауы некенің кешігуіне әсер ететін факторларға жеке тұлғаның білімі және экономикалық мүмкіндіктері, жұмыс күшінің ұтқырлығы, жаһандық нарықтарға қол жетімділік, сондай-ақ жұмыс орнының тұрақсыздығы және еңбек нарығының белгісіздігі жатады. Әлемнің кейбір елдерінде жастардың жұмыспен қамтылуының нашарлауы отбасын құруға, әсіресе ер адамдар арасында кедергіге айналып бара жатқаны байқалды, ал әйелдердің табыс табу қабілеті олардың әлеуметтік мәртебесі мен шешім қабылдау қабілетінің тұрақты өсуіне әкелді. Бұл тенденциялар әлеуметтік-экономикалық жағдайға және мәдени нормаларға байланысты қоғамда әр түрлі болғанымен, жалпы көрініс бүгінде адамдарда бұрынғыдан да көп таңдау бар екендігін көрсетеді.