Жастардың жоғары білімді таңдауға қатысты ата-ана ұстанымдарын әлеуметтанулық талдау

Аңдатпа

Жастардың жоғары білімді таңдауын зерттеуде ата-ана ықпалын ескеру маңызды. Ата-ананың жоғары білім беру саласындағы тәжірибелері мен ұстанымдары жастардың таңдауына әсер етеді. Жоғары білімді таңдауда жастар ата-анасының кеңестері мен отбасының әлеуметтік-экономикалық жағдайын ескереді. Мақалада ата-ананың жастардың жоғары білімді таңдауына ықпалы сараланады. Мектеп түлектерінің ата-анасымен жүргізілген сұхбат нәтижелері берілген. Іріктеу жиынтығы 100 респондентті құрайды. Алынған мәліметтер ата- ананың білім деңгейі, тұрғылықты жері, отбасының әлеуметтік-экономикалық мәртебесі мен жастардың біліми таңдауы арасында байланыстың бар екенін көрсетеді. Ата-анасының білім деңгейі жоғары болғанда жастар жоғары біліммен қатар, жоғары оқу орнынан кейінгі білімді алуға да талпыныс көрсетеді. Ата-анасының білім деңгейі төмен болған жастар орта арнайы білім алуды да қарастырады. Тұрғылықты жердің де ықпалы бар. Кіші қалаларда мамандықты таңдауда ата-ана ықпалымен қатар туысқандардың әсері де болады. Ірі қалаларда кәсіби таңдау жасауда тек отбасы ішінде талқылау жүргізіледі. Алынған мәліметтер жоғары білімді таңдауда ата-ананың ықпалын тереңірек түсінуге мүмкіндік береді. Ата-ананың білім деңгейі мен отбасының әлеуметтік жағдайы әлеуметтік жіктеу факторы ретінде анықталады. Зерттеудің практикалық маңыздылығы кеңес беру бағдарламаларын жетілдіруге мүмкіндік беретін деректерді ұсынумен байланысты. Бұл мектеп пен ата-ана арасындағы қарым-қатынасты жақсартуға және жастардың жоғары білімді таңдауда ата-ана ықпалының маңыздылығы туралы хабардарлықты арттырады.