Азаматтардың медициналық көмектің сапасын арттыруға қатысуын қамтамасыз ету үшін фокус-топтық сұхбат әдісін қолдану

Аңдатпа

Мақалада Қазақстан Республикасының Үкіметі мен Халықаралық Қайта Құру және Даму Банкі (Дүниежүзілік Банк) арасындағы Келісім шеңберінде Қазақстан Республикасының Денсаулық сақтау министрлігі іске асырған жобаның нәтижелері келтірілген.

«Әлеуметтік медициналық сақтандыру» жобасы азаматтардың денсаулық сақтау секторына енгізілетін жақсартуларды қамтамасыз етуге қатысу мәдениетін құруға, пациенттерді денсаулық сақтау жүйесін реформалауға қатысуға, халықтың қажеттіліктері мен қоғамдық денсаулық сақтау мүмкіндіктері арасындағы тепе-теңдікті белсенді іздеуді ынталандыруға бағытталған.

Жобаның маңызды аспектісі - социологиялық зерттеу құралдарын қолдана отырып, жеке медициналық ұйымдар деңгейінде пікірталастар мен талқылаулар құру, олардың ішіндегі ең маңыздысы фокус-топтар болды.

Фокус-топтар сапалы деректерді алу үшін ұзақ қолданылу тарихы бар әлеуметтанулық зерттеулердің қолайлы әдісі болып табылады. Мақалада ақпараттандырылған қоғамдық мониторинг және кері байланыс тетігін пилоттық енгізу шеңберінде медициналық қызметтердің сапасын арттыруға азаматтардың қатысуын қамтамасыз ету үшін фокус-топтық сұхбаттарды бейімдеу тәжірибесі қарастырылған.

17 медициналық ұйымда ұйымдастырылған фокус-топтық пікірталастар азаматтарды денсаулық сақтау жүйесін реформалау үдерістеріне қосу құралына айналды, пациенттер мен медициналық мекемелер арасында сындарлы диалог қалыптастыру жөніндегі құралдың рөлін атқарды. Сондай-ақ халықтың қажеттіліктері мен қоғамдық денсаулық сақтау мүмкіндіктері арасындағы тепе-теңдікке қол жеткізуге мүмкіндік берді. Емханалар мен стационарлардың пациенттерімен 298 фокус-топты талдау нәтижесінде авторлар медициналық ұйымдарға тіркелген халықтың қажеттіліктері мен қалауларын анықтау үшін осы әдістің жарамдылығы мен тиімділігін көрсетті.

Фокус-топтық сұхбат барысында жекелеген медициналық ұйымдардың жұмыс істеу деңгейіндегі мәселелер (дәрігерлік қабылдау, талдаулар мен аспаптық зерттеулерді ұйымдастыру; ауруханаға жатқызу рәсімдері; кезектерді реттеу, жекелеген мамандарға жазылу және т. б.) және институционалдық деңгейде шешімдерді талап ететін мәселелер  (кадрлардың жетіспеушілігі; медициналық мамандардың біліктілігі мен құзыреттілігі; әсіресе ауылдық елді мекендерді дәрі-дәрмекпен қамтамасыз ету және т.б.) айқындалды.